"Me gusta"-ren indarra

Lana dela eta, facebook-eko orri bat (ez profila) kudeatzeko erantzukizuna eman didate, eta bertan, erakundearen gorabeherak argitaratu behar ditut, egunero. Ordea, zenbait egunetan, "enpresari" hertsiki lotuta ez dauden gaiak ere interesgarriak deritzogu, eta orduan jendeak eskatuta edo arrakasta nahiko izango duten itxaropenarekin, post "bereziak" plazaratzen ditugu, jarraitzaileen interesekoak izango direlakoan.

Horiek dira adibidez, kirolaren inguruko sarrerak, Nazioarteko Egunak, etab. Apirilaren 19an, ezagun batek "Bizikletaren eguna" zela esan zidan, eta facebook-en hori adierazteko gomendioa helarazi zidan. Eta horri lotuta, bururatu zitzaidan jendeari "Atsegin dut" ikonoaren gainean klikatzeko eragitea, bidirekzionaltasuna suspertzeko, beraiek "ikus-irakurtze" gainazal hori gainditzeko.

Nire sorpresarako, ia 50 pertsona gurekin bat etorri ziren (ikusi irudia) eta arrakastatsua baino arrakastatsuagoa izan zen egun horretako sarrera facebooken. Herriko jendea bikain portatu zen.

Izan ere, oso erraza da "Atsegin dut" gainean klik egitea (idaztea baino azkarragoa), are gehiago kirolari edo gizarteari lotuta badago informazioa, eta beste alde batetik, esan beharra dago lagunei erronka txikiak gustatzen zaizkiela.

Bizimodu geldiezinean, independienteki eta erlojuari lotuta mugitzen garen kultura honi, ondo datozkio ekintza txiki hauek, segundu bakar batean behintzat erakusteko, bat egin dezakegula gizabanakoek zerbaiten alde.

Oporraldi aurreratua

Pasaden ostiralean, lanean geundela Interneterako konexioa desagertu zitzaigun. Bai, bapatean ez genekien non bilatu, zer kontsultatu, norekin partekatu,  non argitaratu... laburrean esanda, ez genekien nola jardun.

Eguneroko nire lanean behintzat aurreikusita dago, besteak beste: herriari buruzko google-en alertak kontsultatzea, lankideek sortu dezaketen informazio publiko interesgarriak hedabide digital ezberdinetan publikatzea, facebook-eko plataforma kudeatzea... eta hori guztia konexioa barik, ezinezkoa da.

Enpresako teknikari informatikoa gainera oporretan zegoen, beraz, beste zeregin "analogikoetara" ekin nion.

Lanegun erdia pasa eta lankide batek bere iPad-a eta smartphone-a piztu. Hura bai ideia ona! Wifia dute bi "katxarroek", eta horretaz baliatu, ondoko ordenagailuak hornitu zituen, ohiko jarduerei bueltatuz.

Hausnarketa: internet-a desagertuko balitz... auskalo zer nolako etorkizuna izango genuke...!